อุปาสิกา ยถาวุตฺตอุโปสถสีเลน สีลวตี, สามเณโร ปน อตฺตโน สามเณรสีเลน สีลวาฯ อุปฺปติตฺวาติ อากาเส อุปฺปติตฺวาฯ โมกฺโข นตฺถิ ทุกฺขาวหสฺส กมฺมสฺส กตูปจิตตฺตาฯ

ทุวิเธปิ กาเมติ วตฺถุกามกิเลสกาเมฯ กิเลสกามํ ปริจฺจชนฺโต เอว หิ วตฺถุกาเม ปริจฺจชติ นามฯ วิพฺภมนวเสน อาคจฺฉติ ภิกฺขาย อาหิณฺฑนาทิปพฺพชิตกิจฺจโตฯ อุปฺปพฺพชิตฺวา วิคตสีลสฺส ชีวโต อานาปานมตฺเตน ชีวนฺโตปิ โส มตโกวฯ วุตฺตญฺเหตํ ‘‘มรณญฺเหตํ, สุนกฺขตฺต, อริยสฺส วินเย, โย สิกฺขํ ปจฺจกฺขาย หีนายาวตฺตตี’’ติ (ม. นิ. 3.45)ฯ

อุณฺหฏฺเฐนาติ สปริฬาหฏฺเฐนฯ อภิธาวถาติ อภิธาวตีติ อิมสฺมิํ อภิธาวนกิจฺเจ ภทฺทํ เต โหตูติ วตฺวา คิหิภาวาย อภิธาวถฯ นีหริตฺวาติ นิกฺขาเมตฺวาฯ เอกาทสหิ อคฺคีหิ อาทิตฺตตฺตา มหาฑาหสทิเสฯ สลฺลกฺเขตฺวาติ คิหิภาเว อาทีนวํ, ปพฺพชฺชาย อานิสํสญฺจ สลฺลกฺเขตฺวาฯ หิโรตฺตปฺปํ ปฏิลภิตฺวา ‘‘มม อุปฺปพฺพชิตุกามตํ สพฺรหฺมจาริโน ชานิสฺสนฺตี’’ติฯ จตุนฺนํ ปริสานํ จิตฺตสงฺโขภวเสน สกลชมฺพุทีปํ โขเภตฺวาฯ

สานุสุตฺตวณฺณนา นิฏฺฐิตาฯ

6. ปิยงฺกรสุตฺตวณฺณนา

[240] ปจฺจนฺเตติ ปริยนฺเตฯ ปาฏิเยกฺกนฺติ สงฺคีติกาเล วิสุํฯ ยมกวคฺคาทิกา พฺราหฺมณวคฺคปริโยสานา ฉพฺพีสติ วคฺคา เอติสฺสาติ ฉพฺพีสติวคฺคา, ตนฺตีติ ปาฬิฯ อุจฺจารปสฺสาวาทิ เอวรูปํ ทุพฺโภชนํ, ‘‘อสุจิเชคุจฺฉภาเวน ทุฏฺฐุ โภชน’’นฺติ กตฺวา, ทุพฺโภชนคฺคหเณน วา วนฺตคพฺภมลาทีนิ อติทิสติฯ ฉวิอาทีนิ เฉตฺวาติ ฉวิอาทีนิ อติวิชฺฌ อติวิย ปวิสิตฺวาฯ อฏฺฐิมิญฺชํ อาหจฺจ อฏฺฐาสิ ปีติสมุฏฺฐานอุฬาโรฬารรูปปฺปวตฺติยาฯ เตนาห ‘‘หทยงฺคมนีโย หุตฺวา’’ติฯ